ამა წლის 20 თებერვალს, ლიტურგიკის კათედრის ინიციატივითა და
სემინარიის ფაკულტეტის დეკანატის ხელშეწყობით, სასულიერო სემინარიის
მესამე კურსის სტუდენტებმა, ლიტურგიკის პედაგოგის - გიორგი მეტრეველის
- ხელმძღვანელობით, შიომღვიმის მონასტერი მოინახულეს. სამონასტრო
კომპლექსის დათვალიერების, მონასტრის მოლოცვისა და იქ დაცული
სიწმინდეების, მათ შორის, ღირსი მამის - შიო მღვიმელის - წმინდა
ნაწილების თაყვანისცემის შემდეგ, ბატონმა გიორგი მეტრეველმა
სტუდენტებს ლექცია წაუკითხა. პედაგოგმა დეტალურად ისაუბრა შიომღვიმის
მონასტრის ისტორიის, მისი კულტურულ-საგანმანათლებლო მნიშვნელობის, იქ
მოღვაწე ბერებისა და მონასტრის უძველესი ტიპიკონის შესახებ.
ჩვენი კულტურული მემკვიდრეობის, მათ შორის, ეკლესია-მონასტრების
მონახულება/მოლოცვა, მათი ისტორიის, არქიტექტურისა და საეკლესიო
მხატვრობის ნიმუშების ადგილზე გაცნობა/დათვალიერება და შესწავლა
თბილისის სასულიერო აკადემიისა და სემინარიის
სასწავლო-საგანმანათლებლო პროცესის განუყოფელი ნაწილია.
შიომღვიმის მონასტერში გატარებული ეს ერთი დღე
სტუდენტებისთვის შემეცნებითი თვალსაზრისითაც მნიშვნელოვანი იყო და
სულიერადაც - მარგებელი.
